![GSH APP](https://gazetashqiptare.al/wp-content/uploads/2022/04/gshok.jpg)
![Download on Apple Store](https://balkanweb.com/wp-content/uploads/2019/01/ios.jpg)
![Get it on Google Play](https://gazetashqiptare.al/wp-content/uploads/2022/04/android-app.png)
Një ngjarje e rëndë është shënuar ditën e djeshme në Tiranë, kur një efektiv policie i zënë në befasi është plagosur rëndë.
Sipas të dhënave, bëhet me dije se efektivi ka marrë një plagë dhe është dërguar menjëherë për në Spitalin e Traumës dhe është vendosur nën kujdesin e mjekëve, të cilët kanë treguar se është jashtë rrezikut për jetën, pavarësisht se gjendja e tij është e rëndë.
Policia, në një njoftim zyrtar, bëri me dije vetëm faktin që është vënë në pranga autorja e atij sulmi, një 22-vjeçare, banuese në Paskuqan.
Policia ka sekuestruar thikën dhe ia ka kaluar çështjen për hetim Prokurorisë së Tiranës, për të vijuar më tej me procedurat e atij akti të rëndë që i rrezikoi jetën punonjësit të Policisë.
Po ç ‘ndodhi vërtet mes vajzës dhe policit?
Efektivi i Policisë që u plagos mësohet se ka mbërritur në familjen Gj. në Paskuqan për t’i komunikuar një thirrje kryefamiljarit Ali Gj. për t’u paraqitur në Komisariatin e Policisë.
Ai ishte i dyshuar për një rast vjedhjeje dhe Policia e Komisariatit nr. 4 ka dashur të sigurojë dëshminë e tij dhe më pas ta linte të lirë.
Por menjëherë sapo punonjësi i Policisë i ka kërkuar Aliut se duhet të paraqitej për të dëshmuar në Polici, ka reaguar vajza, Shqipe Gj.
Ajo ka nisur të konfliktohet me policin, duke i thënë se nuk mund të merrej i ati i saj, sepse ai nuk i kishte bërë asgjë të keqe kujt.
Efektivi, duke dashur ta shmangë vajzën, ka nisur të flasë sërish me kryefamiljarin e në bisedë e sipër me të, vajza ka marrë një thikë dhe e ka goditur.
Menjëherë është dërguar polici në spital dhe vajza 22 vjeçe është vënë në pranga.
Babai 76-vjeçar i agresores i dyshuar për një grabitje:
Nga të dhënat policore, nuk bëhet me dije se për çfarë vjedhjeje ishte dyshuar burri 76-vjeçar dhe as se çfarë debati ka sjellë përplasjen që desh rezultoi fatale për jetën e efektivit 36-vjeçar.
Policia nuk bën të ditur as faktin nëse është shoqëruar i moshuari në komisariat, por të dhënat tregojnë se familja Gj. është e vendosur prej disa vitesh në zonën e Paskuqanit dhe se nuk rezultojnë të jenë familje problematike.
Ali Gj. është babai i një djali dhe i katër vajzave, një prej të cilave ka kundërshtuar dhunshëm shoqërimin e tij në komisariat si i dyshuar për vjedhje.
Pritet dëshmia e vajzës, efektivit të Policisë dhe e kryefamiljarit për të qartësuar shkaqet që quan në plagosjen me thikë të efektivit.
Po ashtu, do të verifikohen edhe praktikat e ndjekura nga ana e bluve për të kryer shoqërimin e të moshuarit në komisariat, bën me dije Policia, për të parë nëse ka pasur ndonjë shkelje. (Panorama)